Biforcos: Un cruceiru de caminos, una romería centenaria

La final del branu, tiempu tamién de la final de las culleitas, coincide cuna celebración d’esta romería mariana qu’axunta a tódolos puebros de la contorna

BiforcosA

Santuariu de Biforcos

Nún valle al pía del purtiellu’l Carbayal, y baxo la mirada d’una antigua canal, ou carril, que los romanos fecieran yá van casi mil años pal suministru d’augua de las minas d’ouru d’As Médulas, atóupase’l Santuariu de la Virxen de Biforcos, un paraxe d’espectacular fermosura que s’alcuentra arrodiáu de verdes praos.

Yía bien chamadeira la etimoloxía del valle que da’l ñome a esti llugare, Biforcos, del llatín bifurcus (biforcáu, que se biforca), tien orixen nas palabras llatinas bi- (dous, dobre) y furcam (furcada), literalmente una furcada de dúas puyas ou gayos, cuno sentíu metafóricu d’un sitiu onde s’estrema en dous ramales un caminu, un rieu ou un valle. Lo mesmo qu’asocede cuno francés carrefour (cruceiru), del llatín quadrifurcus (furcada de cuatro gallos, ou tamién cuatro caminos). Yía una etimoloxía que tien una gran harmonía cun Ambasauguas, el puebru al que pertenez el Santuariu, qu’ía outra división ou biforcu, pero nesti casu de la unión de dous rieos, de dambas auguas.

L’orixen d’esti Santuariu puede entendese ñestoncias cumo un cruceiru de caminos, ¿quiciabes yiera’l llugar desde onde antias se biforcaban dous caleyos, unu al traviés del purtiellu’l Carbayal hacia Cabreira, y outru contra’l Valle de Llousada y Ribeira (las vieyas divisiones de los partíos territoriales de la Gobernación de Cabreira no siegru XVII)?.

L’actual santuariu llevantóuse sobre outra armita románica d’antias, mueito más antigua y qu’estaba no mesmu llugare. La igresia sufriéu varios arregros a lo llargo de la sua hestoria. Unu de los más importantes data del añu 1601, cuando se construyiéu la sua nave central y se dotóu al Santuariu d’un fermosu artesonáu feitu cun piqueiños y refinaos cuadraos de madeira.

Porche de la igresia de Biforcos

Pórticu de la igresia de Biforcos

El sou retabru renacentista foi añedíu no siegru XVIII cun doce tabras policromadas nas qu’aparecen escenas de la vida de la Virxen, onde’l color rubiu y el ñegru son predominantes, y outra tabra central cun un Cristu Crucificáu.

Purcima’l sagrariu atóupase una talla románica de la Virxen muei guapa, que tamién está policromada. El restu de las imáxenes qu’antias tuvo’l Santuariu de Biforcos ora están no Museo de los Caminos de Astorga, onque se da la calamidá que la corona de la Virxen foi furtiada va unas décadas, de seguru que pa la sua venta no mercáu ñegru d’arte sacro.

Más tarde reformóuse tamién en 1818, pero yía na segunda metá del siegru XX cuando l’edificiu chegóu a estar en pior estáu por cuenta del sou abandonu. No añu 1985 pur casu, un furacán esbarrumbóu la sua espadaña, que yá sufriera un arregru años atrás, y foi necesaria la sua reconstrucción.

El Santuariu de Biforcos cunta cun una Hermandá que foi fundada a finales del siegru XIII. Pero nun foi hasta van poucos años, despuéis d’estar prácticamente saparecida, cuando la Hermandá se refunda ñuevamente no siegru XXI cuno ñome d’Hermandad de la Santísima Virgen de Viforcos.

Gracias a esta Hermandá y a las subvenciones que l’Ayuntamientu d’Encinéu foi xestionando durante varios años, principia no añu 2012 un arregru a xeitu, tanto del interior cumo del esterior del Santuariu. Una rehabilitación que permitiéu la conservación d’esti patrimoniu cabreirés que güei lluz guapu y curiosu nuna redolada silenciosa, chena de misticismu y espiritualidá, que convida a güeyar sin priesas cuna mirada tranquila, pero cun un tanticu d’embruxu, en dirección a la igresia y al paisaxe que la arrodia.

Pulo tradicional la romería mariana dedicada a Biforcos realizábase siempre’l 8 de sanmiyiel, precedida d’una novena n’honor a la Virxen. Antias cumo ora, yía una romería a la que vai xente a esgaya de toda la comarca. La Santa misa y la procesión siguen a la música, a la gaita, frauta ou tamboril. Los d’antias llevaban la merienda, que se comía sobre la pradería. Ora bancos y mesas baxo una carpa, dan pasu a un festín de pulpu á feira y outras viandas.

Yía una romería que quier ser un modelu, un exemplu del mantenimientu de las tradiciones y del patrimoniu cultural, y pa la que nesta oucasión va cuntar cuna presencia d’outras imáxenes marianas procedentes d’outros puebros cabreireses.

Cartel de la romería de la Virxen de Biforcos 2015

Cartel de la romería de la Virxen de Biforcos 2015

La Hermandad de la Santísima Virgen de Viforcos ellaboróu un programa d’actividades que se van facer durante estos días y qu’unen la festividá de la romería y el folclore cabreirés cuna devoción que nestos puebros se tien a la Virxen de Biforcos desde fa cientos d’años:

 

– Del 20 al 28 d’agostu a las 20:00 horas va haber una novena diaria no Santuariu n’honor a la Virxen de Biforcos.

 

Día 25 d’agostu, martes:

– Regunión ordinaria de l’asamblea xeneral de la Hermandad de la Santísima Virgen de Viforcos. 18:00 primer convocatoria y 18:30 segunda convocatoria.

 

27 d’agostu, xueves:

– Esposición del Santísimu y procesión d’antorchas.

– Cena y beille na pradería del Santuariu (pula voluntá de 10 €).

 

29 d’agostu, sábadu:

Gran romería n’honor de la Virxen de Biforcos.

– 12:15 horas, procesión desde la igresia de San Pedro de Quintaniella de Llousada hasta’l Santuariu de Biforcos.

– 13:00 horas, Santa misa no Santuariu de Biforcos.

– 14:00 horas, Pulpu, churrascu, chourizu, etcétera. Comida animada pula Charanga Terras do Bibei hasta las 20:00 horas.

 

30 d’agostu, diumingu:

– 13:00 horas, Santa misa no Santuariu de Biforcos.

 

Actuación de los danzantes de Corporales na romería de Biforcos del añu 2013.

 

One thought on “Biforcos: Un cruceiru de caminos, una romería centenaria”

  1. Pingback: Ambasauguas rinde honor a la Virxen de Biforcos | El Cabreirés
  2. Trackback: Ambasauguas rinde honor a la Virxen de Biforcos | El Cabreirés

Deja un comentario

Tu dirección de correo electrónico no será publicada. Los campos obligatorios están marcados con *