Cabreira celebra’l sábadu la festividá de San Antonio de Padua

Mañana día 13 de San Juan principian las festividades n’honor a San Antonio de Padua que se celebrarán en Cabreira, cumo por casu nos puebros de Santolaya, La Baña ou Pombriegu. Mañana van terminar tamién las Novenas oufiertadas a esti santu lisboeta.

Cartel de la fiesta bañesa

Cartel de la fiesta bañesa

En La Baña, pola mañana va celebrase la Santa misa a las 13:00 horas acompañada de la procesión. La charanga “Terra do Videi” recorrerá todas las caleyas. Pola ñueite habrá pa tódolos presentes una chourizada acompañada de carne cocída, un buen complementu pa coyer fuerzas pal beille de las 24:00 horas.

 

En Santolaya, la “Orquesta Akuar” va ser la encargada d’animar el beille d’esta pequeiña aldeya cabreiresa. La celebración d’esti día n’honor a San Antonio de Padua tien una gran tradición nesta localidá. D’antiguo tras la Santa Misa de la mañana cantabáse’l Ramu y salía la procesión conos danzantes. Son bien chamadeiras las danzas que se realizaban nesti día en Santaolaya y qu’anguaño yá se perdieron.

Danzantes de Santolaya no añu 1945.

Danzantes de Santolaya no añu 1945

Pola tarde representábase la vida y milagros del santu, que cono son d’un gaiteiru acompañaba no beille a los danzantes y los personaxes de la Dama y el Graciosu. Los danzantes vistían calzones y camisas de llinu, llevaban un pañuelu llargu de cerras y sobre la cabeza un gorru adornáu con tirelos y prumas, xunto con unas castañuelas en cada mano. La Dama llevaba tocáu brancu y las meyores prendas que tuviera, mientras que’l Graciosu diba mal vestíu, con unos chucayos ataos al llombu y na mano llevaba un palu con un botu de maciar el lleite cono qu’abría’l pasu entre la multitú faciendo rir a la xente.

Deja un comentario

Tu dirección de correo electrónico no será publicada. Los campos obligatorios están marcados con *