Caldu de berza cabreirés

El caldu cabreirés yía un pratu de cuchare, ideal pal enviernu. La sua base principal yía la berza cabreiresa, que nesta parte del añu tien un gustu mueito menos fuerte gracias a las xiladas. El segundu elementu que tien esti pratu son las fabas brancas, de tipu reñón, y tamién dalgu de xixa ou untu de cochu pa da-ye sabore. Yía un pratu bien completu que tomaban los homes y muyieres del campu, pero nun tien una receta única, yá qu’en cada casa podía variar la receta. Lo que sí yía verdá, yía que la receta ameyora se’l pratu está cucináu del día anteriore.

Caldu cabreirés. Foto: Juan.

Caldu cabreirés. Foto: Juan.

Ingredientes:

  • Berza cabreiresa (coulina) ou repollu de fueya verde.
  • Fabas brancas de reñón.
  • Patas de cochu.
  • Oureya.
  • Costiella.
  • Panceta.
  • Chourizu.
  • Patacas.
  • Ayu.
  • Pimentón.
  • Sal.
  • Aceite.

Ellaboración:

La xixa que s’utilice puede variare, yá que se puede puñer llacón ou tamién un güesu de xamón, pero pulu xeneral tien de ser carne salada ou afumada que se deixa remoyar durante un día, lu mesmu que las fabas brancas. Pero la panceta y el chourizu nun yía necesariu puñelus a remueyu.

Nuna perola púñese a cucer la xixa, y pasáu un cuartu d’hora tírase esi augua y púñese augua llimpia. Déixase outra vez sobre’l llume y déixase cruquiar espacín.

N’outra perola púñense las fabas cubiertas d’augua fría, cuando ruempa a ferver asústanse con un gotín d’augua fría pur trés veces, despuéis vamus añediendo’l caldu y la xixa de la outra perola y, cuando las fabas estean yá casi cocídas, eichámos-ye la berza bien picadina y despuéis purcima la pataca partida en cachos. Siguimos añediendo’l caldu de la xixa hasta qu’estea todu cubiertu. Salamos al ñuesu gustu.

Lus chourizus y la panceta nun precisan cucer tanto, asina que se sacan antias y se deixan que sigan cociendo la pataca y el restu la carne hasta qu’estea todu bien cocíu. Hai que tener en cuenta que’l tiempu total de cución y ellaboración d’esti pratu pue chegar a las 3 horas.

Cuando estea todu cocíu macíanse dous dientes d’ayu no morteiru, púñese-ye un poucu de pimentón, un poucu d’aceite, y éichase-ye todu al caldu.

¡Buen proveitu!

Deja un comentario

Tu dirección de correo electrónico no será publicada. Los campos obligatorios están marcados con *