Chegóu’l Branu Cultural a La Cuesta

Actividades na Cuesta

Actividades na Cuesta

El Branu Cultural organizáu pula Asociación Cultural Trimuella va celebrase desde esti sábadu hasta’l xueves 11 d’agostu. “Conferencia mazcaradas cabreiresas” inaugura la programación cultural d’esta localidá

Cunos “Campaneiros”, La Cuesta inaugura esti sábadu el Branu Cultural organizáu pula Asociación Cultural Trimuella cuno sofitu del Ayuntamientu de Trueitas y la Diputación de Llión.

Nesta oucasión, l’asociación preparóu un programa d’actividades bien guapu y bien completu cun charras, talleres, maxia y hasta un cuentacuentos para que los vecinos y achegaos de la localidá lo pasen bien.

Yá’l sábadu, cunel títulu ‘mazcaradas cabreiresas’, l’investigador Iván Martínez Lobo va impartir una interesante conferencia na Casa de Cultura de La Cuesta. Va ser a las 19 horas cuando esti cabreirés y amás redactor d’esti periodicu dea a cuñecer distintos aspectos etnográficos pouco cuñecíos de las mazcaradas cabreiresas. Despuéis de la charra, va pidise l’aguinaldu cunos Campaneirus, mazcarada de la localidá. Lluego todos xuntos, vecinos y campaneiros, cenarán lu recuyío pulas casas.

Pal llunes 8 d’agostu hai programada una actuación de maxia pulo mago Sinsaladin, pa rapaces y nou tan rapaces. El miércoles 10 d’agostu va facese un taller d’alfarería tradicional desde las 17:00 pa mayores y mozos a partir de los 10 años

Y yá’l xueves 11 d’agostu, el cuentacuentos Pablo Parra visitará pula mañana a las 12:00 esti llugar p’animar a todos los nenos pequerrines y nou tan pequerrines cun el sou espectáculo de cuentines pul mundu alantre.

Y cumu broche final d’esti branu cultural, va realizase una actividad pa que los vecinos faigan dibuxus cun xielu, pompas xigantes y malabares cun Alexa Gómez, vecina del puebru y presidenta de l’asociación.

Tódalas actividades son de baldre y van facese na casa de Cultura de La Cuesta, localidá del Ayuntamientu de Trueitas.

Deja un comentario

Tu dirección de correo electrónico no será publicada. Los campos obligatorios están marcados con *