Denuncian los actos vandálicos contra las señales de Trueitas

L’asociación El Teixu denuncia ante la Guardia Civil de Trueitas los sabotaxes contra las señalizaciones viales del conceyu


escacharrau

Fotografías d’una señal estropiada y de los llabores de reparación

Según pudo saber esti periódicu, el pasáu 19 de xañeiru l’asociación El Teixu – Rede pal estudiu y defensa de la llingua asturllionesa, interpuxo una denuncia no cuartel de la Guardia Civil de Trueitas. El motivu d’esa denuncia yíe polos actos vandálicos que se vienen repitiendo dende’l mes d’agostu del añu pasáu contra las señales nuevas de carreteira billingües (en castellanu y cabreirés) que l’Ayuntamientu de Trueitas instalara en dalgunos puebros del conceyu no mes de santamarina del añu 2015.

Tal que s’indica na denuncia d’esta asociación, los estropicios y los actos vandálicos nas señalizaciones municipales siguen faciéndose na actualidá contra la señalización vial propiedá del Ayuntamientu de Trueitas, polo qu’estos feitos podríen ser constitutivos d’un delitu siguíu (art. 74 del Códigu Penal) de daños previsto no artículu 263.2.4º del Códigu Penal al afectar a bienes d’usu públicu. Complementariamente, caúna de las conductas d’escachamientu ou de desllucimientu feitas na señalización municipal pueden constituyir tamién infracciones individuales previstas no art. 37.13 de la Llei Orgánica 4/2015, de 30 de marciu, de protección de la seguridá ciudadana.

L’asociación El Teixu apurriéu datos y pruebas nas que s’indican las fechas y llugares nos que los carteles aparecieron estropiaos. Por fortuna, mueitos d’eillos foron reparaos en varias facendeiras nas que participoron las asociaciones culturales de Cabreira Alta y la mesma asociación que fa esta denuncia. Seya que nou, aspérase que nos próximos días se dea empiezu a la instrucción d’esti casu y que la Guardia Civil pueda investigar l’autoría d’estos atentaos contra los bienes d’usu públicu.

Deja un comentario

Tu dirección de correo electrónico no será publicada. Los campos obligatorios están marcados con *