Faciendo fusa cuna música de Tornadera

Mañana sábadu 29 d’agostu va tener llugar el conciertu de música tradicional de l’agrupación bañezana Tornadera, que nos han a presentar el sou últimu trabayu discográficu “Faciendo fusa”, a las 20:00 horas na Aula Cabreiresa de Trueitas (na escuela).

Cartel del conciertu de Trueitas

Cartel del conciertu de Trueitas

Tornadera yíe un grupu tradicional de gaitas llionesas que xurdiéu a cuenta de los alcuentros y ensayos que facían un grupín d’amigos aficionaos a la música tradicional llionesa, música qu’interpretaban pulo normal cun gaitas de fuelle cabreiresas.

Los ensayos principiorun de forma habitual desde l’añu 1999, pero foi a rayíz del Encuentro de Gaiteros y Tamboriteros Tradicionales Leoneses celebráu n’Estorga nel añu 2000 cuando’l grupu principia a facer actuaciones en públicu, onque pasará un añu más hasta que nel 2001 formalicen la formación rexistrándose en La Bañeza cumo grupu de música tradicional y Asociación Cultural.

El nome de Tornadera provien de la vieya ferramienta de llabranza que s’utilizaba pa dar vuelta a la paya, pero tal que comenta’l mesmu grupu pa eillos tien un dobre significáu, «por un lado significa motivación y acción de “tornar a”, “volver a” las fuentes tradicionales y autóctonas que culturalmente han identificado a nuestra tierra y nuestras gentes. Por otro lado, el nombre “Tornadera” conlleva un sentido metafórico; un “dar la vuelta a” todo ese acúmulo de culturas y estilos musicales que los medios de comunicación nos imponen en forma de modas pasajeras y con prioritarios intereses comerciales».

Una torna ou vuelta a los cantares de la herencia musical tradicional que’l grupu Tornadera quier reinventar dientro del contestu cultural actual, pur cuenta de facer desfrutar a quien-yes escueitan, faciendo participar al públicu cun una animación cercana y directa.

 

La Carolina, interpretada pula agrupación de música tradicional Tornadera.

Deja un comentario

Tu dirección de correo electrónico no será publicada. Los campos obligatorios están marcados con *