Fiestas del Carmen na Baña

Cumu cada añu, esti vienres principian unas de las fiestas cun más devoción pa lus bañeses y bañesas, las del Carmen, virxen patrona de lus marineirus, qu’en La Baña a falta de mar se compensa cun unu de lus llagus glaciares más guapus del sur d’Europa, el Llagu de La Baña

Cartel de la fiestas del Carmen de La Baña.

Cartel de la fiestas del Carmen de La Baña.

El vienres día 15 habrá beille a las 21:00 horas cuna orquesta Los Players, que tamién tocará a partir de la 1:00 de la ñueite.

El sábadu 16 será’l día grande, y las caleyas estarán animadas desde primer hora de la mañana cunas festaxeiras charangas. Más tarde va celebrase la Santa Misa y la precesión.

Pulla tarde habrá xuegos pa lus ñiñus y pulla ñueite a partir de las 21:15 horas la gran orquesta Televisión de Galicia animará la fiesta -cun un descansu pa podé cená-.

Las personas que visiten La Baña van tené la oportunidá de perdese pullas caleyas del llugar y contemplá l’arquitectura tradicional cabreiresa qu’on se mantien de pias. Son d’interés l’armita del Carmen y la igresia parroquial, construyida cun una guapa cúpula d’estilu bizantinu cun cimborriu.

L’amante del senderismu tamién tien mueitas opciones yá qu’esisten dalgunas rutas de mueita fermosura pa gociá de la ñaturaleza. Pur una parte’l ñomáu Llagu de La Baña, y pur outra la xubida a lus cumbres d’El Picón ou Peñataravinca, ou la ruta que lleva al saltu d’augua, la cascada chamada La Fervienza.

Deja un comentario

Tu dirección de correo electrónico no será publicada. Los campos obligatorios están marcados con *