Fiestas n’honor a San Ildefonso en Castro

Cartel de la fiesta

Cartel de la fiesta

Esti sábadu chegará la fiesta a esta localidá de Ribeira, l’aldeya del pantocrator cabreirés

El sábadu día 23 de xañeiru a las 13:00 horas celebraráse la Santa misa n’honor a San Ildefonso, antias los gaiteiros recorrerán las caleyas de la localidá. Pula ñueite a partir de las 21:00 horas gran beille cuno Trío Florida, que volverá ñuevamente a tocar tras la cena, desde la 12:00 hasta las tantas de la mañanica.

Castro ñaciéu cuna dominación romana cuno sou castru de Santa Cruz; puebru bien allargáu -1 km.- na vera dereita del rieu Cabreira y que se deixa ver namás xubiendo a Robledo. Antias d’entrar en Castro vemos a la dereita, entre castañales y en cruciando’l riéu, la capiella de San Ildefonso. Las primeiras casas pulos dous llaos forman el barriu La Pedreira; más abaxo y a la dereita, L’Outeiro, y casi enfrente, La Cruz. El centru del puebru forma Los Nogueiros y del Foyo, siendo ésti’l barriu más antiguu y no que se llevanta l’arrogante igresia de piedra rubia que foi d’estilu románicu, quedando na fachada que mira al Naciente un pantocrátor de piedra policromáu tan interesante pula sua temática cumu pula sua rareza en tierras llionesas (namás hai outru en Carracedo). Esti chena todu’l centru del semicírculu una mandorla cun un Pantocrátor sentáu nún sentayu “curul” cun remates en forma de cabezas de felinos, bendiciendo y cun un llibru na zurdia. Ocupan el restu del tímpanu los símbolos del Tetramorfos, todos eillos alaos. Tien restos de la sua policromía orixinal a base de coloráu, azul y ñegru. Gómez-Moreno fechalu no siegru XII.; No interior hai que ver una imaxen de Santa Catalina del siegru XV. Outros barrios son La Corralada, a la zurdia y frente al del Foyo, y las postreiras casas componen El Penedo, La Devesa y Fondolugar. Dende principios d’esti siegru cuntaba Castro cun fábrica de lluz eléctrica que suministraba eletricidá a puebros del baxu Cabreira.

Deja un comentario

Tu dirección de correo electrónico no será publicada. Los campos obligatorios están marcados con *