Forna vístese d’época

Una guapa iniciativa quier recuperar d’un xeitu bien orixinal aqueilla roupa tradicional que vistían lus ñuesus güelus

Beille en Corporales (1932).

Beille en Corporales (1932).

Dientru de lus actus programaus pa las fiestas n’honor de la Virxen de lus Remedius, que se van celebrar la próxima fin de semana en Forna, la Xunta Vecinal d’esti llugar organizóu una concentración de traxes d’época na que todu aquel que quiera va poder achegar vistíu cumu se facía nus añus 30, 40 ou 50 del siegru pasáu.

La iniciativa fornesa tomóu cumu exemplu al llugar bercianu de Toural (Toral de los Vados), una localidá con un importante pasáu ferroviariu onde lus sous paisanus tamién remembran tódolus añus aquel pasáu industrial d’esi llugar vistiéndose cumu lu facían lus d’antias.

En Forna tamién asperan que la ideya tenga mueitu ésitu y pueda repitise lus próximus añus, pulu qu’animan a tódolus puebrus de Cabreira ou d’outras comarcas a participar no eventu no que podrán vistise cun roupas tradicionales el diumingu 15 de mayu y tamién el llunes 16 día de San Petecostés durante la Santa Misa y la procesión. El diumingu va ser a la 13:15 y el llunes a las 12:20, y pur supuestu, nun va faltar la música de lus gaiteirus.

Cumu añu tras d’añu vien siendo habitual, mueita xente va achegar andando a la fiesta desde lus puebrus cercanus, cumu pur casu desde La Baña, onde se sigue utilizando la carruna vieya que xubía pulus praus de Forna. Pur que todus estus andarines puedan recuperar fuercias pa la fiesta, la organización va tener preparaus dalgunus pinchines a la sua chegada.

Muyeres bañesas (1922)

Muyieres bañesas (1922)

¿Cúmu se debe dir vistíu pa esta oucasión?

Quiciás, una de las meyores descripciones sobre la roupa cabreiresa d’aqueilla yía la que fa l’escritor estorganu José Aragón Escacena na novela costumista de 1921 ambientada no llugar de La Baña.

L’autor diz sobre la muyier que «lleva la cabeza cubierta con el clásico mantiellu, que sólo deja el óvalo de la cara. Viste camisa de lino, cultivado en sus riberas, y sobre ella un justillo de amplio y redondeado escote. De la cintura, y por encima del justillo, pende un rígido y pesado rodáu de pardo, que sujetan con un uriellu. Calza pesados zruecos de cuero con suela de madera y lleva piales, medias que llegan sólo hasta el tobillo y que sujetan al pie una trabilla que pasa por debajo del empeine». Del home, diz Aragón Escacena, qu’el sou traxe yía «de paño de pardo: calzón ajustado, almilla y montera. Calza como la mujer, los recios zruecos sobre los piales de lana».

¿Qué más actividades festaxeiras va haber?

Vienres 13

  • 23,30 h. Discoteca móvil na carpa-bar de casi 200 m2, pa nun tener frieu.
Cartel de fiestas

Cartel de fiestas

Sábadu 14

  • 16,30 h. Campeonatu de bolus cabreireses.
  • 23,30 h. Beille na carpa instalada n’armita cuna actuación del TRÍO FLORIDA.

Diumingu 15

  • 13,15 h. Santa Misa y procesión, acompañada de gaiteirus y de las personas que deseyen dir vistidas cun roupas d’antias.
  • 18,00 a 22,00 h. Beille de tarde cuna actuación del TRÍO MAYEL.

Llunes 16

  • 12,30 h. Santa Misa y procesion acompañaus de gaiteirus, y de quienes quieran dir pur última vez cunas roupas d’época.

Deja un comentario

Tu dirección de correo electrónico no será publicada. Los campos obligatorios están marcados con *