Gran romería mariana de la Ñuesa Siñora de Biforcos

Yía una romería que quier ser un referente, un exemplu de recuperación de las tradiciones y del patrimoniu cultural, y pa la que nesta oucasión va cuntar tamién cuna presencia de la imaxen de Llamas de la Virxen del Valle

biforcos

Santuariu de Biforcos

Pulo tradicional la romería mariana dedicada a Biforcos facíase siempre’l 8 de sanmiyiel, precedida d’una novena n’honor a la Virxen. Antias cumo ora, yía una romería a la que vai xente asgaya de toda la comarca. La Santa misa y la precesión siguen a la música, a la gaita, frauta ou tamboril. Los d’antias llevaban la merienda, que se comía sobre los praos. Ora bancos y mesas purbaxo d’una carpa, dan pasu a un festín de pulpu á feira y outras viandas.

Pa esta oucasión la Hermandad de la Santísima Virgen de Viforcos fizo un programa d’actividades qu’unen la festividá de la romería y el folclore cabreirés cuna devoción que nestos llugares se tien a la Virxen de Biforcos desde fa cientos d’años.

 

Programación

cartelDel 18 al 26 d’agostu

  • A las 20:00 horas va haber una novena diaria no Santuariu n’honor a la Virxen de Biforcos.

Xueves 25

  • Esposición del Santísimu y precesión d’antorchas.
  • Cena na pradería del Santuariu (pula voluntá de 10 €).
  • Beille cuno Trío Media Noche.

Sábadu 27

Gran romería n’honor de la Virxen de Biforcos.

  • 12:15 h. Precesión desde la igresia de San Pedro de Quintaniella de Llousada hasta’l Santuariu de Biforcos cuno grupu de música y beille de Pombriegu, Aires de Cabrera.
  • 13:00 h. Santa misa no Santuariu de Biforcos.
  • 14:00 h. Pulpu, churrascu, chourizu, etcétera. Comida animada pula Charanga Terras do Bibei hasta las 21:00 horas.

Diumingu 28

  • 13:00 h. Santa misa no Santuariu de Biforcos.

 

La sua historia

L’actual santuariu llevantóuse sobre outra armita románica d’antias, mueito más antigua y qu’estaba no mesmu llugare. La igresia sufriéu varios arregros a lo llargo de la sua hestoria. Unu de los más importantes data del añu 1601, cuando se construyiéu la sua nave central y se dotóu al Santuariu d’un fermosu artesonáu feito cun piqueiños y refinaos cuadraos de madeira.

DSC_0592

Retabru de Biforcos

El sou retabru renacentista foi añedíu no siegru XVIII cun doce tabras policromadas nas qu’aparecen escenas de la vida de la Virxen, onde’l color rubiu y el ñegru son predominantes, y outra tabra central cun un Cristu Crucificáu.

Purcima’l sagrariu atóupase una talla románica de la Virxen muei guapa, que tamién está policromada. El restu de las imáxenes qu’antias tuvo’l Santuariu de Biforcos ora están no Museo de los Caminos de Astorga, onque se da la calamidá que la corona de la Virxen foi furtiada van unas décadas, de seguru que pa la sua venta no mercáu ñegru d’arte sacro.

Más tarde reformóuse tamién en 1818, pero yía na segunda metá del siegru XX cuando l’edificiu chegóu a estar en pior estáu pur cuenta del sou abandonu. No añu 1985 pur casu, un furacán esbarrumbóu la sua espadaña, que yá sufriera un arregru años atrás, y foi necesaria la sua reconstrucción.

Sin título-1

Pintura restaurada

El Santuariu de Biforcos cunta cun una Hermandá que foi fundada a finales del siegru XIII. Pero nun foi hasta van poucos años, despuéis d’estar prácticamente saparecida, cuando la Hermandá se refunda ñuevamente no siegru XXI cuno ñome d’Hermandad de la Santísima Virgen de Viforcos.

Gracias a esta Hermandá y a las subvenciones que l’Ayuntamientu d’Encinéu foi xestionando durante varios años, principia no añu 2012 un arregru a xeitu, tanto del interior cumo del esterior del Santuariu. Una rehabilitación que permitiéu la conservación d’esti patrimoniu cabreirés que güei nos aparez guapu y curiosu nuna redolada silenciosa, chena de misticismu y espiritualidá, que convida a güeyar sin priesas cuna mirada tranquila, pero cun un tanticu d’embruxu, en dirección a la igresia y al paisaxe que la arrodia.

¿Biforcos cun be ou Viforcos cun uve?

Nave central del santuariu

Nave central del santuariu

Quiciás haba una asignatura pendiente al respective de los errores ortográficos que se vienen faciendo desde fa yá unos años a la hora d’escribir el ñome de la Virxen y el topónimu del que deriva. Onque popularmente se creye que “Viforcos” s’escribe cun uve pur estar el sou ñome rellacionáu cuna palabra “valle” (el espaciu orográficu no que s’atopa, el Valle de “Viforcos”), esta yía una hipótesis que nun se sostien n’absolutu se s’analiza desde’l campu de la filoloxía y la toponimia. Seya que nou, podría dase una evolución d’esi tipu dando cumo resultáu’l ñome de “Valdebiforcos”, pero nunca cumo “Viforcos”.

Biforcos, vien del llatín bifurcus (biforcáu, que se biforca), y tien orixen nas palabras llatinas bi- (dous, dobre) y furcam (furcada), literalmente una furcada de dous gayos, cuno sentíu metafóricu d’un llugar onde s’estrema en dous ramales un caminu, un rieu, ou un valle. Yía lo mesmo qu’asocede cuno francés carrefour (cruceiru), del llatín quadrifurcus (furcada de cuatro gallos, ou tamién cuatro caminos).

Deja un comentario

Tu dirección de correo electrónico no será publicada. Los campos obligatorios están marcados con *