Robréu encomienza las suas grandes fiestas y estrena ñueva igresia restaurada

Esta fin de semana esti puebru cabreirés va celebrar las suas fiestas locales n’honor al Santo Cristo

Programa de fiestas de Robréu

Programa de fiestas de Robréu

Robréu aproveita las suas fiestas patronales que principian güei mesmu pa inaugurar mañana sábadu’l ñuevu armante del teitu de la sua igresia parroquial, qu’onque la sua estructura yá foi axeitada va un añu, el proyectu nun rematóu hasta ora. Trátase d’un armante de madeira de par y ñudiellu, una técnica d’época medieval inventada pulos artesanos carpinteiros mozárabes, que nun utiliza nengún cravu y qu’ora’l Centro de los Oficios de León recuperóu pa la igresia parroquial d’esti puebru cabreirés.

Sin duda una buena oucasión pa contemplar esta obra d’arte pero tamién pa gozar de las fiestas locales.

Principiando desde esta mesma ñueite vamos cuntar cuno Trío Mayel de Pontevedra que promete animar cun una gran verbena a tódolos asistentes.

Mañana sábadu día 22 d’agostu, va celebrase la Santa misa, procesión y inauguración de la ñueva cubrición del armante de la igresia a las 13:00 horas. Pa esti día va cuntase cuna Orquesta Alto Standing que va ser la encargada de la música no beille de la tardecina y tamién pula ñueite.

El domingu 23, va celebrase ñuevamente la Santa misa a las 13:00 horas, y pa rematar vamos tener un gran beille fin de fiesta cun Dúo Musical.

Robréu yía tamién unu de los puebros cabreireses que cunta cun una de las rutas etnográficas más guapas. Yía unu de los conxuntos de palombares más importantes de la provincia de Llión, compuestu pur 8 palombares. Los palombares tienen una estructura circular y llevántanse sobre muros de pizarra revocaos cun tollu y cal. El llouxáu yía a una augua, y pur baxo’l sou refaldráu hai una repisa de llouxas voladas pur onde las palombas se pousan pa entrar y salir al traviés de las troneiras. Sobre’l llouxáu colocábanse xeixos que sirvían p’atrayer a las palombas.

Deja un comentario

Tu dirección de correo electrónico no será publicada. Los campos obligatorios están marcados con *