La Baña celebra’l Corpus

La BañaLa Baña va celebrá una de las suas fiestas más tradicionales, el ‘Corpus Christi’ esti xueves y vienres.

Las frores de las escobas y las ñotas de los instrumentos de las orquestas, van sé los elementos que van puñé la ñota de color a estas dúas xornadas que se preve d’intensu calore, ña que se van desenvolvé los actos.

Pulla mañana del xueves 4 del mes de San Juan será la Santa misa, procesión y pasacais al cargu la charanga “Los amigos” pa dá pasu despuéis a la verbena de tarde cuña orquesta “Solara”. Esta mesma orquesta va rematá’l día cun una Gran Verbena a partí de la 1 la mañana.

Yá’l vienres día 5 del mes de San Juan va sé’l turnu de la orquesta “Israel”, que del mesmu xeitu que la del día anteriore, va realizá un pase a las 9 la tarde pa terminá cun outra gran verbena que va emprencipiá’l sigundu pase a la 1 la mañana.

Los visitantes a estas fiestas van podé desfrutá del Llagu de La Baña situáu onde conflúyen la Sierra de Mina y la Sierra de Cabreira. El sou orixen y configuración xeomorfolóxica respuenden al más clásicu de los modelos de la erosión glaciare. Con una superficie aprosimada de 0,075 kilómetros cuadraos, el llagu aparez arrodiáu d’un perfectu circu glaciare, que de la mesma está rematáu polos altos cumbres (sobrepasan los 2.000 metros d’altura) de Peñataravinca y Peña Surbia. Desde’l puntu de vista xeolóxicu destaca la bien conservada y enorme morrena glacial, compuesta por llábanos de pizarra, que sirve pa cerrá esti llagu ño que tien las suas fuentes unu de los más importantes afluentes del Sil: el riou Cabreira. Chégase a la ouriella del Llagu de La Baña caminando desde’l propiu puebru de La Baña.

El visitante tamién va podé acercase a cualesquier de los puebros de Cabreira Baxa p’almirá l’arquitectura tradicional de la zona, sobre todu las suas balconadas zarradas, las suas chumineyas, y los sous palombares.

Deja un comentario

Tu dirección de correo electrónico no será publicada. Los campos obligatorios están marcados con *