La parva y las dieces na siega del pan

La siega del pan encomenzaba a mediaus de santamariña y chegaba hasta principius d’agostu, qu’ía cuando se daba pasu a la maya’l centenu, sapartando a golpe de manal la grana de la espiga pa poder facer despuéis la molienda

guevos

Güevus fervíus cun pimentón

Principiábase a segar primeiru pulus praus de secanu, avanzando día tras día hacia las tierras que yieran más húmedas pula cercanía de lus regatus. Yiera un trabayu no que xeneralmente s’ayudaban unus vecinus a outrus, y no que participaban tanto homes cumu muyieres, ayudando tamién a las familias cun poucus recursus, que pur enfermedá ou outru motivu nun podían sacar p’alantre la siega. Intentábase d’eigual xeitu que tódalas tierras del puebru terminaran segándose pulas mirmas fechas pa poder principiar asina cuno acarréu de lus feixes de paya.

Trabayábase siempre de sol a sol, cuna fouce cumu única ferramienta afilada cuna que curtiar las manadas de centenu. Apenas se paraba unus raticus a las horas de las cumidas y la siesta pa descansare. A pesar de la dureza del sol y de las llargas xeiras de trabayu, la siega tenía ambiente festaxeiru y pasábase’l día cantando y de buen humore. Nun hai qu’esquecer la importancia que suponía la recoyida de la colleita del centenu, yá que yiera la base de l’alimentación de todu l’añu, motivu abondu pa estar allegre.

La xornada principiaba cuno desayunu (que consistía en sopas de pan ou un cachín de pan moyáu n’auguardiente), trabayábase pur unas tres horas y hacia las 9:30 ou 10:00 almorzábase (un de lus pratus más típicus de la siega yiera una ensalada fría que se facía cun güevus fervíus y bacaláu esmigayáu), despuéis volvíase a trabayar pur outras dous horas, comíase (caldu cun toucinu, chourizu ou llacón, y un cachu de pan de centenu) y dormíase la siesta, trabayábase pur dous ou tres horas más, merendábase, y siempre se terminaba la xornada trabayando hasta que se despintaba’l sol.

Tódolus segadores comían xuntus, y xeneralmente de la mirma pota, asemeyáu a cumu se facía nus trabayus de la siega: en comunidá. Nunca nun faltonun nas comidas una bota de vinu a la que da-ye un treitu, nin tampoucu faltóu’l lleite mazáu, el sueru resultante de maciar el lleite dientru d’un botu. Pa lus segadores l’agriu sabor d’esti lleite resultaba bien fresquín baxo’l calentexu del sol de la siega.

GÜEVUS FERVÍUS CUN BACALÁU ESMIGAYÁU Y PIMENTÓN

Ingredientes:

  • 300 gramus de bacaláu esmigayáu.
  • 3 güevus.
  • 2 cebolletas.
  • pimentón.
  • sal.

Ellaboración:

El bacaláu tien de ser del saláu, pulu que lu tendremus que desalar pur cachus metiéndolu nun recipiente cun augua dientru del frigoríficu entre 24 y 48 horas. Amás vamus tener que cambiar l’augua unas 3 ou 4 veces pa facer bien el procesu de desaláu.

Fervemus lus güevus y deixámoslus enfriare.

Mientras, escaldiamus el bacaláu. Metémoslu n’augua y retirámoslu cuando l’augua ruempa a fervere. Deixámoslu enfriar tamién.

La cebolleta curtámosla n’arus. Podemus escaldiala ou deixala al ñatural.

Cuando lus güevus yá estían fríus cortámoslus en lláminas ou pur la metá.

Yá podemus principiar a empratare. Facemus una cama cunas lláminas de lus güevus, y sobre eilla ponemus la cebolleta. Salamus.

Despuéis, ponemus purcima’l bacaláu esmigayáu y espolvoriscamus bien de pimentón. Pa rematare, eichamos un buen chorretón d’aceite d’oliva.

¡Buen proveitu!

Deja un comentario

Tu dirección de correo electrónico no será publicada. Los campos obligatorios están marcados con *