La patrona de Cabreira Baxa vuelve a xuntar a lus cabreireses

La Virxen del Valle, la qu’ía considerada cumu la patrona de la pizarrra y lus pizarreirus, volverá acuyer alredor del sou santuariu de Llamas a la popular romería que no sou honor s’oufierta cada primer diumingu despuéis de Pascua

Valle

Armita de la Virxen del Valle. Foto: Diputación de León.

Nún llugar entre Llamas y Oudoyu, no corazón de Cabreira, atópase na veiga del regueiru d’Ulleirus la humilde armita de la Virxen del Valle, regueirín que metafóricamente-yi beisa lus pías. Llugar dende onde pueden contemplase las fonduras del valle de Silván y lus cumbres on ñevaus de Peñataravinca.

Esti llugar, onde se crucian lus rieus Cabreira y Silván, foi cristianizáu pulus primeirus monxus y armitañus de la Tebaida berciana, qu’a partir del siegru IV llevantonun las suas igresias y armitas nus llugares onde antias esistiera’l cultu a lus dioses romanus ou ástures, cumu son pur exemplu lus casus de La Guiana, Santa Elena, Virxen del Castru, ou de la Virxen del Valle. Las güellas d’esta presencia romana son bien evidentes, y más cuando purcima l’armita puede contemplase cun buen xeitu unu de lus trazaus de carriles romanus meyor conservaus de Cabreira.

Pa esti diumingu aspérase a más de mil personas venídas dende toda la comarca cabreiresa, del Bierciu y de Valdeorras, que van oucupar lus praus de la redolada qu’hai al pía d’aquesta senciella armita, onde van poder cumer y pasar el día. Aquesti llugar va ser l’escenariu de la popular romería, referencia de toda Cabreira, onde estiañu se volverá a repitir la tradicional procesión que dende l’armita va llevar a la virxen, cubierta cuno sou mantu azul, al alcuentru de la Virxen de Biforcus y la de Llamas hasta la Cruz de Piedra, momentu de gran respetu onde se van bendicir lus campus y tamién se va cantar la Salve.

Despuéis, la tradición manda que tódalas imáxenes xuntas se dirixan contra l’armita, cuno pendón púrpura pur delantre la procesión, y lus músicus rematando la comitiva, qu’estiañu va cuntar cuno grupu de gaitas y danzas Aires de Cabrera, de Pombriegu. Al llegar a l’armita yía costume arrodiellase alredor pa facer un ritu secular no que las andas de las vírxenes pasan purcima lus pelegrinus mientras se canta l’himnu de la Virxen del Valle:

“Virgen del Valle querida,

paloma entre las praderas,

amparo del caminante,

radiante sol de Cabrera.”

La romería sigue cuna homilía na que se recuerda’l  gloriosu descubrimientu de la imaxen nuna peña, xuntu al regatu que baxa dende’l picu Cruz Mayor. Despuéis, dase las gracias a la patrona de Cabreira Baxa pula ñueva riqueza que nestus tiempus sal de lus ñuesus montes: la pizarra. Yía pur esu qu’esta querida virxen yía considerada tamién patrona de la pizarra y de tódalas personas que güei trabayan nesti sectore.

Veleiquí’l programa de la romería:

  • 11,00 h. Misa por tódolos cofrades.
  • 11,45 h. Procesión dende l’armita al alcuentru de la Cruz de Piedra, de la Virxen de Biforcus y la de Llamas. Cuna participación del grupu de gaitas y danzas “Aires de Cabrera”.
  • 13,00 h. Misa Mayor.
  • 14,00 h. Beille vermú cuno “Trío Expresión”.
  • 16,00 a 20,00 h. Beille pula tardiquina cuno “Trío Expresión”.

Deja un comentario

Tu dirección de correo electrónico no será publicada. Los campos obligatorios están marcados con *