La película «Lobos Sucios» nun se va estrenar güei en nenguna sala llionesa

Nin Ponferrada, nin Llión, van proyectar el llargumetraxe que s’estrena esta ñueite nas prencipales capitales españolas y que tanta relación tien cuna comarca de Cabreira

Cartel de Lobos Sucios

Cartel de Lobos Sucios

La tan asperada película, que cunta las penurias que se vivierun durante la Segunda Guerra Mundial na mina de wolfram de Casaio, controlada pulus nazis alemanes, nun se va poder ver en nenguna de las salas de cine de la provincia de Llión. Y yía que, mientras la sua proyección pal estrenu de güei sí qu’está programada en mueitas de las prencipales capitales españolas, lus llioneses van quedar cunas ganas de vela a pesar de la gran vinculación histórica que lus feitus narraus na película tienen cun Cabreira y cuno Bierciu, yá que d’aqueilla mueitus paisanus cabreireses trabayorun bien duru nesa mina. Una mina que tamién foi obxectivu militar pa la Federación de Guerrillas León-Galicia, lus maquis que rondaban ñestoncias pulus montes cabreireses.

Asperamus que gracias a las buenas críticas qu’esti filme está recibiendo de lus críticus y lus espectadores que pudierun vela nus festivales nus que foi amuestrada, ceu pueda proyectase en mueitas más salas de cine españolas. Peru pul momentu, dende Cabreira lus llugares que quedan más cerquina pa poder ver la película son nus cines Hollywood de Monforte, nus cines Abella de Lugo, ou nus cines Casablanca de Valladolid. Dende la capital de Llión lus cines más próximus serían lus de Yelmo Los Prados n’Uvieo.

La llista completa de los cines puede consultase pinchando eiquí.

 

Ficha técnica

  • Títulu orixinal: Lobos sucios.
  • Añu: 2015
  • Director: Simón Casal.
  • Guión: Carmen Abarca, Paula Cons, Felipe Rodríguez, Noelia del Río.
  • Música: Sergio Moure.
  • Fotografía: Sergi Gallardo.
  • Repartu: Marian Álvarez, Manuela Vellés, Isak Férriz, Pierre Kiwitt, Thomas Coumans, Sam Louwyck, Ricardo de Barreiro, Xose M. Esperante.
Trailer del llargumetraxe Lobos Sucios (2015)

Festivales

  • OUFF – Festival de Cine Internacional de Ourense.
  • Mill Valley Film Festival.
  • FIFF – Festival Internacional de Films de Fribourg.
  • 21 Kolkata Internacional Film Festival.

Premius

Nominada pula Academia do Audiovisual Galego a 14 nominaciones pa lus premius Mestre Mateo do Audiovisual Galego d’estiañu.

  • Meyor película.
  • Meyor director: Simón Casal de Miguel
  • Meyor actriz protagonista: Marian Álvarez.
  • Meyor actriz de repartu: Manuela Vellés.
  • Meyor actor de repartu: Ricardo de Barreiro.
  • Meyor guión: Paula Cons, Carmen Abarca, Noelia del Río y Felipe Rodríguez.
  • Meyor fotografía: Sergi Gallardo.
  • Meyor música orixinal: Sergio Moure.
  • Meyor dirección de producción: Carlos Amoedo.
  • Meyor montaxe: Jordi López.
  • Meyor dirección d’arte: Antonio Pereira.
  • Meyor vestuariu: Marta Anta.
  • Meyor soníu: Guilhem Donzel y Srdjan Kurpjel.
  • Meyor maquillaxe y peluquería: Oriane de Neve y Antonella Prestigiacomo
Making of de la banda sonora obra de Sergio Moure, interpretada pula Madrid String Orchestra

Deja un comentario

Tu dirección de correo electrónico no será publicada. Los campos obligatorios están marcados con *