Las ‘Fumeiras’ de San Juan en Corporales

150619 - 039

Fumeira de Corporales. Fotu: www.elcabreires.com

La ñueite de San Juan cumo tamién se la conoz, tien los sous oríxenes abondo anteriores a la relixón cristiana. D’antiguo creyíase que la Tierra y el Sol estaban ñamoraos y que él nun quería sapartase d’eilla faciendo asina’l día más llargu. Las personas tenían miedu porque’l Sol nun recuperara toda la sua rellumancia pasada esta fecha y decidieron facer conxuros con fugueiras y ritos de fuegu para que las suas llaparadas nun s’amataran

D’eiquí que se fale d’esta ñueite cumo la meyor pa realizar encantamientos d’amor y de fertilidá, y xunto al efecto purificador que se-ye atribúye al fuegu la superstición diz que yíe un buen día pa escabildar a los malos espíritos.

Na ñueite de San Juan, vieyos rituales de fuegu on aguantan en Cabreira. Unu d’estos llugares yíe Corporales qu’onque treslladaron la fiesta a la fin de selmana, permanez el ritual d’atropar escobas y prende-yes fuegu al soníu de las gaitas.

Dalgunos vecinos celebroron asina esti ritual paganu esti pasáu vienres, l’encomienzu del branu alredor d’una gran fumeira, arrodiando ésta por tres veces nun sentíu y outras tres n’outru pa pidir un buen añu chenu de deseyos y sin nengún tipu de males. Foi una ñueite máxica.

Esti domingu pasáu foi’l solsticiu de Branu, y esti momentu foi motivu de celebración casi desde’l principiu de la humanidá y na sua mayor parte vai asociáu a creyencias paganas. Sin embargu, la relixón en ciertu modu apoderóuse d’estas fechas rellacionándolas con dúas de las fiestas más importantes de la sua tradición. Asina, el solsticiu de branu asociase cono día de San Juan, y el d’enviernu cona ñacencia de Jesús. Y curiosamente son las únicas ñacencias que son motivu de fiesta, pos pal restu del santoral solo recuérdanse los fallecimientos.

El términu solsticiu deriva de la unión de dúas palabras latinas sol (sol) y sistere (permanecer quietu). Durante unas horas va parecer que’l Sol queda quietu no cielu y cona tardiquina chega la ñueite más curtia del añu que va dar llugar al solsticiu de branu. Y a partir d’ende los días van dir encurtiándose, cumo si’l Sol fora amatándose espacín.

Pa ver las imáxenes  pulse eiquí.

GLOSARIU:

  • Abondo: Bastante, suficiente.
  • Sapartare: Separar.
  • Rellumancia: Efecto de relucir o brillar. Esplendor.
  • Llaparada: Llamarada.
  • Amatare: Apagar o extinguir el fuego.
  • Escabildare: Espantar, hacer huir.
  • Atropare: Recoger del suelo, juntar, apilar, amontonar.
  • Arrodiare: Rodear.
  • Tardiquina: Atardecer, crepúsculo.
  • Curtia: Corta.
  • Ende: Ahí.

One thought on “Las ‘Fumeiras’ de San Juan en Corporales”

  1. Ivan M. Llobu says:

    Para ver el vídeo:

Deja un comentario

Tu dirección de correo electrónico no será publicada. Los campos obligatorios están marcados con *