Llara, la maldición de las águilas

La ñueva novela del escritor llionés Javier Peréz yá está disponible nas llibrerías dende’l 22 de sanmiyiel

Llara

Portada del llibru

El llibru está ambientáu n’As Médulas, na Hispania del añu 54, y cunta la hestoria de Llara, una moza de deciséis años, que tien tanto odiu no sou peitu que nun siente miedu nenguno. La protagonista fuxiéu de las minas romanas d’ouru, onde compartía la mesa y el lleitu de Publio Gaius Inco, hasta qu’ésti la sustituyiéu pur outra muyiere. Gaius Inco gobierna al sou antoxu la rexón enteira, faciendo valer la fuercia de los sous soldaos y el brillu del ouru qu’arrinca a los montes.

Dispuesta a llevar la sua vengancia hasta las últimas consecuencias, la moza va descubrir que tien el poder de conducir tras eilla a todu un exércitu, y va vese obligada a decidir se acepta’l sou destinu cumo reina de los homes llibres y líder de la desesperada revuelta del pueblu ástur contra’l poder de Roma. Pero, ¿quién yía en rialidá Llara? ¿Quéi secretu ascuende?

Llara yía un cantar d’amor y desventura, una hestoria de vengación implacable, un viaxe de descubrimientu interior y sobremaneira, la hestoria d’una muyier qu’atopa no sou interior un coraxe que xamás soñóu que pudiera esistire.

D’esti xeitu resúmese l’argumentu que da introducción a la hestoria d’esta novela histórica. El sou autore, ganador de distintos premios de novela y narrativa cumo’l premiu Azorín (2006), el José Nozales (2011), la Ciudad de Badajoz (2012) ou l’Ateneo de Valladolid (2014), conforma cun esti llibru la sua oitava novela histórica. Onque acostumáu a la temática de la II Guerra Mundial, cun “Llara, la maldición de las águilas”, traslládanos a la época romana del noroeste peninsulare, a la Gallaecia. Un relatu visceral no que la tradición y el mundu esotéricu de los ástures s’enfrenta contra la Roma más desenvuelta tecnolóxicamente.

 

One thought on “Llara, la maldición de las águilas”

  1. Pingback: “Un lugar de Cabrera de cuyo nombre no quiero acordarme” – El Cabreirés
  2. Trackback: “Un lugar de Cabrera de cuyo nombre no quiero acordarme” – El Cabreirés

Deja un comentario

Tu dirección de correo electrónico no será publicada. Los campos obligatorios están marcados con *