Los Campaneiros ficieron de las suyas en San Martín de Castañeda

IMG-20150517-WA0042El I Desfile de Mazcaradas de San Martín de Castañeda y Vigo de Sanabria xuntoron a más de 250 participantes

Los Campaneiros, el Toru y la Vieya de La Cuesta recorrieron el sábadu, faciendo de las suyas, las caleyas de la localidá senabresa de San Martín de Castañeda no peculiar desfile de mazcaradas, que xuntóu a cerca de 250 participantes. Lo qu’atraxo a estos curiosos invitaos, integradas en quince agrupaciones, foi la concentración ante’l monesteriu no primer alcuentru de mazcaradas organizáu por San Martín de Castañeda y Vigo, que prencipióu a las 16:30 de la tarde con una charra coloquiu na casa de cultura de Vigo de Sanabria al cargu de Bernardo Calvo Brioso.

“Fiestas con orquestas hai en tódolos puebros, pero mazcaradas solo nunos poucos”, sorrayaba Bernardo Calvo Brioso durante la conferencia pronunciada en Vigo de Sanabria pa inaugurar el I Alcuentru de Mazcaradas en Senabria, que destacóu pol color y l’entusiasmu qu’imprimieron los participantes y los mesmos espectadores a la zona. Y ayier, allargando las palabras del historiador, una buena representación de las mazcaradas que dan identidá a diversos puebros acudieron a la fiesta.

La lista de participantes qu’acompañoron a los Campaneiros foi llarga, pero mereciéu la pena asperar a los llioneses Jurrus d’Alija del Infantado, al Atenazador (San Vicente de la Cabeza), Cigarrons (Verín y Riós), Diablo (Villanueva de Valrojo), Felos (Maceda y Vilariño de Couso), Filandorra (Ferreras de Abajo), Folions (Viana do Bolo), Peliqueiros y Parrafons (Campobecerros), Talanqueira y Visparros (San Martín de Castañeda), Talanqueira y Visparros (Vigo de Sanabria), Tafarrón (Pozuelo de Tábara), Troteiros (Bande), la Vaca Bayona (Almeida de Sayago) y la escuela de Folclore de Puebla. Una buena representación de los desfiles más arcaicos de la xeografía peninsular amostróu los sous rasgos en Senabria.

Pola sua parte, los Campaneiros cabreireses, untóron con fariña (onque d’antiguo facíase con cernada) a la mayoría de los asistentes que foron a velos. El Toru emburrióu a la xente y la Vieya pidiéu l’aguilandu cumo se facía tradicionalmente en La Cuesta. “Fáltannos más personaxes de la ñuesa localidá, y amás estamos investigando las d’outras localidades cercanas pa xuntalas a la ñuesa comparsa y facer una representación de toda la comarca de Cabreira” manifestoron miembros de l’asociación cultural Trimuella de La Cuesta que desde va unos años activan y dan fuerza a esta pequeiña localidá cabreiresa por mediu de actividades culturales y la recuperación de tradiciones.

Las meyores imáxenes pulsando eiquí

Deja un comentario

Tu dirección de correo electrónico no será publicada. Los campos obligatorios están marcados con *