Queisu escurríu

Yía un alimentu ñatural que se fa cun lleite de vaca; baxu en grasas y ricu en calciu, potasiu, fósforu y vitamina A; el sou sabor tien un puntín agriu que lu fa perfectu pa combinar cun outrus productus dulces

Queisu escurríu. Foto: Mireia Costillas.

Nun yía Cabreira una comarca que seya cuñecida pula sua tradición queseira, pus esti tipu d’ellaboración láctea yía prácticamente nula eiquina. Antias, las ouveyas y cabras yieran criyadas básicamente pa sacar la xixa y la llana, mientras qu’el ganáu vacunu cabreirés empregábase prencipalmente pa trabayar la tierra cuno aráu y cumu animales de carga, tirando d’aqueillus carrus celtas que facían tanta ruxideira, lus carrus chillones.

El lleite de muñir tomábase bebíu y apenas tenía dalgún tipu de procesamientu salvu pa facer flan, pa sacar la manteiga, la ñata, ou pa facer el lleite mazáu. Pula contra, la ellaboración de queisu nunca nun foi una técnica alimentaria que toviera tradición entre lus pastores cabreireses.

On asina, sí qu’hai una especie de queisu que se facía en Cabreira, a metá de caminu entre lu lo que podría ser un yogur, una cuayada ou un requesón; trátase del «queisu escurríu».

La ellaboración del queisu escurríu facíase de maneira artesanal y, onque la sua técnica nun tien una gran dificultá, tenía de facese a xeitu pur qu’el lleite nun s’agriara demasiáu. Preparábase cun mucizu, que se ponía drentu d’una pota de barru, tapada pur un pañu de llinu, que s’apousaba cerca del llar ou la cocina nun llugar caldiáu. Tenía d’estar asina pur tres ou cuatru días. A esti lleite nun se-ye ponía nengún tipu de cuayu, yá que lus mirmus microorganismus y bacterias acedosas del lleite facían qu’esta llueidara y cuayara. Pa poder acelerar esti procesu, tamién podía enxalabastriase’l lleite cun fueyas de figal, ou añedir dalgunus garbanzus, pur qu’asina’l lleite prendiera antias.

Despuéis metíase drentu d’una fardela de llinu y culgábase no esterior de la casa en dalguna caña d’un árbol próximu. Nún llugar que tenía de ser frescu https://www.acheterviagrafr24.com/achat-viagra-cialis-levitra/ y cun selombra, pa qu’asina pingara soltando todu’l sueru. Una vez dixueirara, namás faltaría sacar el queisu escurríu de la saquina de tela y yá estaría rematáu pa consumire. Acompañáu d’azúcara, miel, mermelada ou membriellu está deliciosu.


RECETA RÁPIDA DE QUEISU ESCURRÍU


 

Ingredientes

  • 1 llitru de lleite frescu del día.
  • 2 cuchares de zumu de llimón ou vinagre.

Ellaboración

Calecemos el lleite a 37º C (se nun respetamos esa temperatura nun vamos consiguir que prenda la reacción química que fa cuayar el lleite). Una vez llograda esta temperatura añedimos las cuchares de zumu de llimón ou’l vinagre pa que cuno ácidu salgan lus culiestrus y principie a sapartase’l sueru de la parte sólida. Déixase repousar pur una hora y despuéis dixueirase cun una tela ou pañu pa escurrir todu’l sueru. D’esti xeitu tan senciellu vamus poder ellaborar en poucu tiempu un sucedaneu del tradicional queisu escurríu cabreirés.

¡Buen proveitu!

Deja un comentario

Tu dirección de correo electrónico no será publicada. Los campos obligatorios están marcados con *