Romería pula Virxen de los Remedios

La romería dedicada a La Ñuesa Siñora de los Remedios cunta en Soutiellu cun una vieya tradición que cada añu vien celebrándose tódolos 8 de sanmiyiel (setiembre). Yía un día festivu qu’axunta a cientos de personas venídas de Cabreira cumo d’outros llugares.

Paisaxes de Soutiellu. Fotografía de Sary Blanco.

La procesión de la Virxen fazse saliendo desde la igresia parroquial de San Pelayo, qu’ía la que s’atoupa más cerca’l puebru, y camínase hasta chegar a l’armita de La Ñuesa Siñora de los Remedios, onde se celebra la misa. Una llienda cunta la enxendra d’esti fermosu llugare: Diz qu’una vez un home viéu a la Virxen y ésta díxo-ye qu’onde chegara una piedra que tirara, ende sería onde se construyiría una armita. Y asina foi cumo se diéu orixen a l’armita y cúmo alredor d’eilla terminorun construyendo’l puebru de Soutiellu.

Esta bella y apacible armita foi construyida no añu 1778, y el sou mayor arregru y restauración foi no añu 2003. Yía dignu de mentar el sou artesonáu y el sou altar de pizarra, asina cumo la sua cuidada redolada. La bien rematada igresia de San Pelayo foi construyida unos años antias, no 1772. Yía singular pur tener una espadaña de tres cuerpos y dous campanas, una del añu 1880 y outra del 1744 que tien grabada la llienda “Mira, vence, reina y después nos defienda de todo mal”. Desde’l sou pórticu puede contemplase’l retabru barrocu cuna imaxen de San Pelayo.

IMG-20150904-WA0025

Arquitectura restaurada. Fotografía de Sary Blanco.

Soutiellu atóupase nuna altitú de 960 metros, y los sous principales barrios son el Bardiusu, l’Apartadeiru, el Cabu, el Chaneiru, la Casavieya y el Regueiru. Cumo la gran mayoría de puebros cabreireses la sua economía básase na esplotación pizarreira, actividá que consiguiéu mantener la vida no llugare.

El puebru tien outros atractivos, el sou impresionante paisaxe ñatural del que yá nos fala’l mesmu ñome’l puebru (Soutiellu, pequeiñu soutu ou arboleda xunto a una veiga), asina cumo la sua arquitectura tradicional. Yía unu de los puebros cabreireses que meyor supo restaurar y mantener el sou patrimoniu, y que puede vese al pasiar entre las suas caleyas, pul molinu tradicional chamáu Rastreiru, pula fraugua, los fornos, los palombares, ou pula fuente cun llavadeiru que s’atopa a la fin del puebru. Un aspectu que fala a xeitu de la sensibilidá y el buen facer de los sous vecinos hacia’l sou puebru.

soutiellu1

Cartel de fiestas

Todu aquel que quiera esfrutar d’esta magnífica romería n’honor de la Virxen de los Remedios y de las grandes fiestas de Soutiellu puede facelo consultando’l programa de las actividades que mañana principian:
Día 7, Llunes:

16:30 Animación infantil.
21:00 Gran cena cun xabarín y empanada, de baldre. Y despuéis Orquesta Aquar.

Día 8, martes:

11:00 Pasacalles.
12:30 Procesión.
13:00 Santa misa.
14:00 Beille vermú cun gaiteiros.
16:00 Beille na armita cun Dúo Musical.
16:30 Animación infantil.
21:00 Gran churrascada, pula voluntá de 3 euros. Beille cun Gran Orquesta y sortéu d’un xamón no descansu.

Día 9, miércoles:

11:00 Pasacalles y alboriada.
13:00 Santa misa y procesión.
14:00 Beille vermú.

Deja un comentario

Tu dirección de correo electrónico no será publicada. Los campos obligatorios están marcados con *