Ruta del mes d’abril – Canal romana de Llamas

Ruta Llamas

Tipu de ruta: a pía.
Tiempu de duración: 45 min.
Distancia: 2,65 Km ida.
Desnivel acumuláu xubiendo: 243 m.
Desnivel acumuláu baxando: 271 m.
Circular: Non.
Temporada recomenda: todu’l añu.

Situación y accesu:

Puede dise desde Ponferrada pola carreteira hasta A Ponte de Domingo Fórez, d’esta localidá parte la carreteira que siguiendo’l cursu del riéu Cabreira, afluyente del Sil, conduznos al puebru de Llamas (prencipiu de Ruta), esviándose contra Castriellu na intersección de la LE-164 a la LE-191/19. El regresu puede efectuase por Cabreira Alta, bien pol puertu del Carbayal ou bien por Peña Aguda (Corporales) y d’eiquí a Castrocontrigu pa salir de la comarca hacia La Bañeza ou Estorga.

Interés:

El prencipal atractivu d’esta ruta yía l’arqueolóxicu y hestóricu, yá que vamos poder conocer in situ un llugar privilexáu no que pueden observase y recorrer espectaculares tramos de canales talladas a picu y visitar dalgunos de los llabores del mayor complexu de minería aurífera romana soterraña del noroeste d’España. Nesti escondíu valle síguen-yes a las canales de suministru d’As Médulas la rede de canales que foi construyida pa la esplotación del complexu mineru de Llamas, que cunta con más de 26 quilómetros de canales y 11 depósitos d’augua. Dambas redes de canales estrémanse fácilmente pola anchura de las obras d’abastecimientu, de 1,35 m p’As Médulas y de 0,80 m pa los de la mina de Llamas. Yía precisu reseñar que l’actividá nesti complexu mineru ruempe dafeitu la rede meridional d’abastecimientu d’As Médulas, polo que puede considerase qu’houbo eiquí una importante estracción d’ouru tras la paralización d’éstas.

El yacimientu d’ouru de Llamas está formáu por un conxuntu de filones de cuarzu que s’atopa repartíu por un área de cerca de 2 km2 que foron trabayaos por mediu de minería hidráulica, utilizándose depuéis la minería soterraña pal sou aproveitamientu en fondura, especialmente no paraxe de “La Casarina”, onde se concentran la mayoría de los trabayos soterraños, consistentes en chumineyas d’estracción sobre filones, galerías tresversales y de drenaxe.

La denudación meteórica ñatural d’esti yacimientu yía la que suministróu la mayor parte del ouru llibre que dióu llugar a los aluviones auríferos del riéu Cabreira a partir de la sua intersección cono regatu de de Valdecorrales, que drena el Valle Airosu, y que foron tamién intensamente trabayaos polos romanos hasta más allá de la localidá de Pombriegu.

1182719_full

Itinerariu:

El recorríu propuestu tien una distancia total d’apenas 2,65 km (namás ida), por onde solo se puede dir a pía, con una dificultá baxa, dáu l’escasu desnivel y l’usu de carrunas en casi todu’l trayectu. Vaise desde la localidá de Llamas p’adentrase no Valle Airosu pola canal C-3 convertida en “carril” (Caminu del Palombar) hasta chegar a los llabores soterraños inferiores del complexu mineru de Llamas. Báxase depuéis hasta la canal C-1, onde s’atopa, al sou pasu pol regatu de Valdecorrales, un túnel (TC-1.3) de 15,5 metros aburacáu a fuegu y augua na cuarcita y una escavación soterraña de 32 metros por debaxo del trazáu de la canal que sirvía como alliviadeiru nos momentos de crecida. Observanse nesta escavación enanches provocaos pola acción erosiva de los materiales rocosos arrastraos pol augua. A partir d’esti puntu’l recorríu de vuelta faise pola caixa de la canal C-1, no sou mayor parte escaváu a picu na lladeira rocosa y que foi llimpiáu y señalizáu en diversos llugares d’interés.

Esti tramu de conducción, pertenez al trazáu de la canal que naz nas proximidades de Santolaya. Nesti llugar la canal trescurre na cota de 870 msnm y destaca pol sou llargu tramu talláu na roca, pola que trescurre formando una auténtica trincheira. Pueden tamién apreciase las dimensiones orixinarias de la canal, que la sou anchura variaba entre un metro y un metro y sesenta centímetros.

1182752_full

En mueitos tramos el recorríu de la canal tenía de superar los macizos rocosos por mediu de la práctica de túneles, cumo puede comprobase nas proximidades del regatu de Valdecorrales. No llugar conocíu cumo “Molín la ventu”, na parede atópase la siguiente inscripción: flaci/interciso/seuroru/itc/susicus. Indícanos que foi un home chamáu Flaccus, de la tribu de los Seurri, puebru indíxena asitiáu nas tierras qu’anguaño se correspuenden cona zona de Sarria (Lugo), quien cortóu la canal nesi puntu.

1182756_full

Deja un comentario

Tu dirección de correo electrónico no será publicada. Los campos obligatorios están marcados con *