Xuegos Tradicionales IX: El Bote Boteiru

Rapaces xugando al Bote Boteiru

Yíe un xuegu similar al yá descritu n’outra oucasión nesti periódicu, La Maya, y podría considerase una variante d’aquél

Esti xuegu consiste n’escondese varios xugadores mientras outru d’eillos va corriendo a recoyer un bote que foi llanzáu d’una patada lo más lluenxe posible por unu de los xugadores. Una vez que recueye’l bote y lu pon nun llugar especificáu, trata de buscar y identificar a cadagunu de los xugadores. Cuando esto asocede, salen dambos xugadores corriendo contra’l bote y gana  aquel  que cueya’l  bote antias (no casu del que se queda, ou-ye dea una patada’l qu’está escondíu).

El Bote yíe un xuegu propiu de rapaces varones y edá cercana a los 15 años, por cuenta de ser  más violentu y más dinámicu qu’outros xuegos, cumo La Maya. Xuégase de día ou de ñueite, pero gana en dificultá cuando se xuega pola ñueite. El númaru de xugadores yíe, eigual que na Maya, alredor  de diez.

Preparativos

Los preparativos d’esti xuegu son bien similares a los yá descritos na Maya, asina que namás vamos describir las diferencias.

El postreiru xugador que se queda cona china yíe’l que nesti xuegu va recoyer el bote mientras los demás s’escuenden y  el que los buscará despuéis recibe tamién el ñome del que «Se queda».

La zona onde se cunta está sustituyida nesti xuegu por un círculu marcáu no suelu, drento del cual está colocáu un bote de lata chenu de tierra ou pequeiñas piedras, ou una botella de plásticu chena d’agua pola metá.

Ñestoncias, el xeitu de cuntar está sustituyíu pol feitu de dir recoyer el bote y ponelu drentu’l círculu. El círculu onde s’apousa’l bote tien de ser una zona chana, sin enzancus alredor pa, desde ende,  poder  llanzar el bote d’una patada sin dificultá. Y de la mirma, esta zona debe d’estar  arrodiada de posibles sitios onde poder escondese.

Desarrollu del xuegu

Una vez escoyíu’l xugador que «se queda», márcase’l círculu no suelu y pónse’l bote drentu d’él.  Unu cualesquier de los xugadores péga-ye una patada y llánzalu en cualesquier dirección, lo más lluenxe posible.  Nesi intre, los xugadores salen corriendo a escondese, mientras el xugador que «se queda»  va corriendo a recoyer el bote y vuelve pa ponelu drentu’l círculu. Esti yíe’l tiempu que tien el restu de los xugadores pa escondese, que cumo puede vese, yíe muei inferior al utilizáu na Maya.

La táctica a siguir pol xugador que «Se queda»  p’alcontrar a los sous compañeiros yíe la mirma que na Maya: sapártase la mínima distancia del bote, pa en casu de tener que salir  contra’l  bote, chegar el primeiru.

Cuando’l que «se queda» alcuentra y identifica a un  xugador, salen dambos corriendo contra’l bote y se chega primeiru’l que «se queda», toma’l bote na mano y da tres golpes con él no suelu, diciendo: ¡Bote boteiru por Fulanu!  Nesti casu, el xugador Fulanu quédase nas proximidades del bote esperando qu’outru xugador lu llibere. Se’l que chega primeiru yíe’l xugador qu’estaba escondíu, ésti da una patada al  bote pa sapartalu del círculu (esti feitu chámase «dar   bote»), y conas mirmas diz:  ¡Bote!, llíbrase a sigo mirmu y a tódolos compañeiros que fueran alcontraos hasta esi momentu, qu’al  eigual qu’él se podrán volver esconder de ñuevu.

El xuegu termina al resolvese’l llance entre’l  xugador que «se queda» y el postreiru xugador escondíu.

Deja un comentario

Tu dirección de correo electrónico no será publicada. Los campos obligatorios están marcados con *