Xuegos Tradicionales VI: La Maya

El xuegu de la Maya yíe’l xuegu del escondite, xuegu universal en tódalas culturas y bien estendíu pur toda España. Suel recibir tamién outros ñomes cumo l’Escondite, las Escondías, etc., onque pur outru llau, estos xuegos nun son esactamente iguales a La Maya

La Maya consiste n’escondese varios xugadores mientras outru d’eillos, cunos güeyos zarraos, está cuntando númaros, hasta una cantidá establecida. Una vez que termina de cuntare, trata de buscar y identificar a cadagunu de los xugadores qu’están escondíos. Cuando alcuentra y identifica a unu d’eillos, salen dambos corriendo contra’l llugar onse se cunta, denomináu Maya, y gana aquel que chegue antias.

La Maya yíe un xuegu no qu’intervienen rapaces y/ou rapazas d’una edá d’hasta 14 años. De normal xuégase de día, ou bien, de ñueite, ganando en dificultá cuando se practica pula ñueite. El númaru de xugadores yíe desde trés hasta los que se quiera, onque de normal yíe alredor de diez xugadores.

Preparativos

Antias de principiar el xuegu escóyese entre los xugadores aquel que se va quedar a cuntare, mientras los demás escuéndense. Pa eillo, tiraban a suertes cun una china ou cun dalgunu de los cantares ou coplas típicas de la comarca:

Pinto, pinto, lagarinto
Hecha las vacas al 25
Y los bueis al 26
Choro, Moro, Vergalloro
Pito redondo
Vete a esconder

Picu, picu, Zaramicu
quien te dióu esi llargu picu
me lu dióu Dious con su trabayu
Pa picar naquel carbayu
Rilla, rilla calabacilla
que na tua casa está Juanilla
Pique y repique un granto que saque
Lu lleve al molinu y todos a cumere.

Del xugador que tien de cuntar dizse namás, y asina se-ye denomina pul restu de los xugadores, que yíe’l que «se queda» (quédase cuna china y quédase a cuntare)… N’outros llugares usan outras espresiones cumo «la queda», «la liga», etc. Una vez escoyíu’l xugador que «se queda», escuéyese La Maya, que yíe’l llugar onde, esti xugadore, va cuntar los númaros, mientras el restu de los xugadores s’escuenden alredor. La Maya tien de ser un sitiu eleváu del suelu pa poder cuntar de pías, y tien d’estar arrodiáu de mueitos sitios onde poder escondese los xugadores. Puede ser el muriu d’una parede, el tueru d’un árbol, una roca grande, etc.

El xugador que «se queda», ponese de cara a La Maya de brazos cruciaos a l’altura los güeyos, pa nun ver a los que s’escuenden, y apóyase cunos brazos na parede. Nesta posición principia a cuntar los númaros tan rápido cumo pueda y llevantando la voz lu suficiente pur que’l restu de los xugadores sepan por ónde va la cuenta y el tiempu que queda pa escondese. La cantidá a cuntar yíe eigual al númaru de xugadores qu’intervienen no xuegu multiplicada por 10. Asina, se son 5, va cuntar hasta 50; se 6, hasta 60, etc. El xeitu de calcular esta cantidá, consiste en dir diciendo, cunas mirmas que se cunta, el númaru de xugadores: diez, venti, trenta, etc., hasta llegar el postreiru.

Desenvolvimientu del xuegu

No intre en qu’el xugador que se «queda» vuélvese contra La Maya y principia a cuntare, los demás xugadores salen corriendo a escondese al llugar que crean tien más dificultá pa ser alcontraos.

El tiempu que tienen los xugadores pa escondese yíe’l tiempu que tarda’l que «se queda» en cuntar la cantidá establecida, más unos segundos de prórroga qu’emprega en terminar cun unos versos y dicir “Voi” bien alto por que todos lu oyan. Despuéis todos los xugadores tienen de quedase quietos no sou llugar d’escondite y el xugador que «se queda» encomienza la busca y identificación de todos y cadagunu de los xugadores escondíos. La táctica a siguir pur esti xugador na busca de los demás yíe, separtase la mínima distancia del puntu onde se cunta p’asegurase la chegada a La Maya primeiru que’l restu de los xugadores.

Cuando un xugador yíe alcontráu y identificáu, dambos xugadores, el que «se queda» y l’alcontráu, salen corriendo contra La Maya cuna mirma intención: chegar  primeiro que’l contrariu, porque’l que chegue antias va salvase. Nesti llance pueden dase los siguientes casos:

  • Que chegue primeiro’l xugador que «se queda». Nestoncia, al chegar a La Maya golpea cuna palma la mano na mirma, diciendo: ¡Un, dos y trés por Fulanu! Cuno que’l xugador Fulanu va quedar na zona de La Maya hasta que remate’l xuegu y, se nun yíe salváu pur outru compañeiru va pasar a ser el xugador que se «queda» no próximu xuegu.
  • Que chegue primeiro’l xugador escondíu. Nestoncias, ésti, tien duas opciones al chegar a La Maya, una, llibrase a sigo mesmu diciendo al golpiar cuna mano na Maya: ¡Alzo La Maya por mi solo!, y outra, llibrase amás d’a sigo mesmu, a tódolos xugadores qu’estuvieran localizaos primeiro qu’él, diciendo nesti casu: ¡Alzo La Maya por mi y por todos mis compañeros! Nesti casu, tódolos xugadores van quedar llibres nesti xuegu y el xugador que «se queda» va siguir buscando al restu los xugadores qu’on s’atopen escondíos. El xuegu remata al resolvese’l llance del postreiru xugador escondíu.

 

Deja un comentario

Tu dirección de correo electrónico no será publicada. Los campos obligatorios están marcados con *