Xuegos tradicionales X: La Comba

Saltando a la comba

L’orixen del saltu de la comba yíe inciertu, onque yíe verdá qu’hai dalgunas teorías que la asitian entre los artesanos de la cuerda del vieyu Exiptu y de la China, que facían xirar las cuerdas cuno fin de recuperar los ramales sueltos de cáñamu. Aquesta practica foi copiada pulos rapaces cumo diversión y, más tarde, foron los marineros quien s’encargoron de dar a cuñocela nos sous diversos viaxes

N’actualidá, esta actividá de saltar a la comba recuñozse socialmente cumo un xuegu popular practicáu tradicionalmente (y casi n’esclusiva) pulas rapazas. On asina, esta tradición femenina, onque se crea lu contrario, nun cunta cun mueitos años de vixencia, yá que nun foi hasta prencipios del siegru XX, cuna incorporación del usu de los pantalones pur parte de las muyeres, cuando l’actividá de saltar a la comba foi popular nesti grupu social.

Hasta ñestoncias foi una práctica esencialmente masculina y, n’actualidá’l sou usu entre los homes mantúvose na mayoría cumo actividá de preparación física en dalgunos deportes cumo pur casu, el boxéu. El carácter tradicional de l’actividá cumo xuegu de patiu asociáu a coplas y cantares infantiles, matiense on na actualidá, en sin embargu adquiriéu y está adquiriendo, en dalgunos países, un carácter más abiertu cumo actividá aeróbica d’entretenimientu dirixida tanto pa rapazas cumo pa rapaces y cun importantes beneficios saludables. D’ende que se presente rellacionada cun programas de promoción de la salú y estilos de vida activu entre la xente xoven y que s’estiénda tanto al campu de la educación formal cumo nou formal.

El procedimientu yíe bien simple: Sorteábase, qué rapazas son las que van facer dar vueltas a la cuerda, pur cualesquier de los procedimientos esistentes, y las dúas que perdían poníanse nos estremos de la mirma y daban. La cuerda trazaba una elipse que tocaba’l suelu llixeiramente nún movimientu rítmicu, y mientras, una ou más rapazas entraban y saltaban el mayor tiempu posible hasta fallare. Cuando esto asocede, el xugador qu’estaba saltando va mudar el papel a dalgún de los que dan a la cuerda.

Esistían mueitas variantes d’esti xuegu y dalgunas d’eillas diban acompañadas de cantares. En principiu namás se precisa d’una cuerda, que va tener distintas características dependiendo de la variante que quiera practicase:

  1. Comba Individual:

En cada estremu de la cuerda suelen ponese unos mangos de madeira ou plásticu que faciliten el movimientu rápidu de las muñecas al facer xirar la cuerda. Consiste namás en saltar la cuerda, lo que favorez la resistencia física del que la practica.

  1. Siguir al Rei ou “Cocherito Leré”:

Dous rapaces dan-ye a la comba. Los participantes pónense nuna ringuileira, estando’l primeiru al llau del que da. El primeiru yíe “el Rei” y marca la pauta. Salta al interior de la cuerda, canta un cantar y sal. Cada llugar utiliza los sous propios cantares. El más cuñocíu yíe “El cocherito leré”. Al siguiente xugador tóca-ye facer lo mirmo. Y asina sucesivamente. Se dalgunu de los participantes falla, esto yíe, traba la cuerda ou s’equivoca no cantare, queda elimináu y yíe sustituyíu pur unu de los que la facían rodare. El xugador va dir saltando y agachándose, esquivando la cuerda, al ritmu que marca’l cantare. Diz asina: “El cocherito leré, me dijo anoche leré, que si quería leré, montar en coche leré. Y yo le dije leré, con gran salero leré, no quiero el coche leré, que me mareo leré”. Cada vez que se pronuncia la palabra “leré”, las dúas personas qu’están dando a la comba llevantan la cuerda y trazan cun eilla un bucle no aire; el qu’está saltando va tener qu’agachase cun tal de nun s’enredar na cuerda.

No xuegu de comba chamáu “El cocherito leré”, el saltador tien de combinar el saltu cuna agachada pa nou trabar las evoluciones de la cuerda. A la fin del cantar sullitríase’l ñome de “María”, y despuéis de cada lletra fazse lo mirmo que cuando se canta “leré”. Considérase que, a partir de los siete años, los rapaces yá pueden sincronizar los sous movimientos al son de un cantare.

  1. A Pasar:

Los participantes van entrando pur velía na comba, saltan una vuelta y salen; terminan a midida que van fallando. Na segunda ronda saltan dúas veces, na terceira tres, y asina sucesivamente hasta que quede un solu participante saltando, que va ser el ganador.

  1. La Barca:

Nesta modalidá la comba balancíase d’un llau pal outru del suelu sin chegar a describir el círculu compretu. Los participantes, que terminan el xuegu pur fallar -ou “facen mala”, pa utilizar el llenguaxe propiu de la comba-, tienen d’entrar pur veces, esquivar la cuerda, saltando una ou varias veces, y salire. En cada ronda va xubise llixeramente l’altura de la cuerda, hasta que namás quede un saltadore, que va ganar la prueba.

  1. El Reló:

Un xugador sostien la cuerda pur un estremu y  ponse no centru d’un imaxinariu reló. Los demás van ponese en círculu alredor d’él, ocupando equitativamente distintas posiciones horarias en función del námeru de xugadores. Se son dolce, cadagunu va ocupar una hora. El xugador qu’esta no centru principia a facer xirar la cuerda ou aguya del reló pul suelu, aumentando progresivamente la velocidá. Los xugadores del círculu tienen de saltar al pasu de la cuerda; si la tocan quedan fora del xuegu. El postreiru yíe’l ganadore.

Deja un comentario

Tu dirección de correo electrónico no será publicada. Los campos obligatorios están marcados con *